Huling Sulat sa Pinas

Rowena,

Kumusta ka na? Kumusta na ang mga bata? Si Aiko nakapag summer class ba? Ang kambal na sina Gina at Gino kumusta graduation nila? Alam kong galit at nagtatampo sila sa akin kasi naman hindi ko nakuhang makatawag man lang sa bahay nung graduation nila at pati ikaw siguro nagtataka na rin kung bakit hanggang ngayon hindi pa ako nakakatawag, ang hirap kasi e nagbago na ang lahat ngayon dito kaya susulitin ko na rin itong papuslit na ipapadala kong sulat kay Pareng Josh. Baka huling sulat ko na rin ito kaya kung sakaling matanggap mo ito huwag ka nang mag-abala pang sagutin ito. Medyo magtipid muna kayo ha, mahirap para sa akin na makita kayong nagtitipid kasi simula’t sapul ginusto ko na magkaroon kayo ng magandang buhay at ayaw kong maranasan ng mga bata ang hirap na dinanas ko noong bata pa ako makakain lang sa isang buong maghapon. ‘Yung ipapadala ko sanang package na naglalaman ng mga pabilin ninyo at ng ilang mga kamaganak napilitan akong ibinta pwera na lang yung sapatos para kay Gino at isang slr camera kay Gina regalo ko yun para sa graduation nila at dahil sa pagpapabenta ko ng laman ng package na dapat ipapadala ko sa katapusan idinagdag ko na lang sa perang ipapaloob ko sa regalo ng kambal. Gamitin ninyo yung pera para sa pag-aaral ni Aiko, dalawang sem na lang naman diba kaya sapat na ‘yun at pagkagraduate niya inihabilin ko na si Aiko kay Ate Fey para kunin siya papuntang  Amerika, para na rin makatulong siya sa mga gastusin sa bahay at para sa pag-papaaral ng kambal. Kung kaya mo rin pala na paikutin ang isang maliit na puhunan manghiram ka muna kay Ate Beth sabihin mo pang negosyo mo bayaran mo na lang pagnabawi mo na ang puhunan. Magtayo ka ng isang maliit na sari-sari store diyan sa may terrace para habang di ko pa kayang kumita may mapagkukuhanan ka sa pang araw-araw na gastusin. At ang kambal pala kausapin mo na baka sa public na sila mag high school kasi baka hindi natin kayanin lalo na at mag thethesis at magoojt na si Aiko sa pasukan, magastus iyon kaya sana maintindihan ng kambal. Babalik din naman sila sa private school pag nakapagtrabaho na Ate nila. Tsaka nga pala may mga appliances na di  naman talaga nagagamit diyan sa bahay naalikabukan lang kaya pwede mo rin iyong ibenta, kung may emergency naman huwag kang mahiyang lumapit kina Nanay alam kong medyo may tampuhan kayo ngayon dahil lang sa maliit na rason pero para sa akin sana maayos  na  yan lalo na kailangang kailangan ngayon. Bago ko nga pala makalimutan ipapasama ko na rin yung mga gamit ko na hindi na pinadala sa akin dito kasi di ko na rin magagamit, yung mga pantalon itago mo muna baka magamit ni Gino paglaki niya para man lang may maipamana akong gamit sa kanya tsaka yung mga pantaas na maayos pa ibigay mo na kina Kuya Jem sabihin mo na lang na hindi ko pa sila gaanong nagagamit kaya halos bago pa yang mga yan. May mga pagkain din pala akong ipapasama mga di na nagamit mula ng last na nag-grocery ako.

Rowena, Mahal…..sa huling dinig ko sa mga nagbabantay sa akin baka daw abutin na ako ng kamatayan dito sa Dubai kasi mabigat ang kaso ko Drug trafficking na napilitan kong gawin para na rin mabigyan kayo ng magandang buhay. Alam kong mali pero natukso ako at kumapit na rin sa napakatalim na patalim. Umamin na rin ako para na rin hindi mauwi sa  pag-bitay kasi sabi ni Kumpareng Josh na umaalalay sa akin ngayon mas mapapababa daw ang sintensya kung kusang umamin ako sa kasalanan na ginawa ko. Ipagdasal niyo ako mahal, at tulungan mo akong humingi ng tawad sa maykapal. Mahal na Mahal kita at ang mga bata, Mahal ikaw na bahalang magpaliwanag sa mga bata. Nasa mga bata na kung ikakahiya nila ako’t kahiyahiya naman talaga pinaggagawa ko dito pero gusto ko lang malamanan nila kung gaano ako kapasalamat na nagkaroon ako ng mga responsableng anak tulad nila. I love you Rowena, alam kong mabigat na ipaasa ko sa iyo lahat ng mga responsibilidad ko kaya kung gusto mo mang humanap ng katuwang okay na sa akin iyon bastat makakasundo ng mga bata, huwag mo akong alalahanin pa tungkol sa bagay na iyan. I love you Mahal.

Nagmamahal,

Romy